廣男仲記得，喺2013年1月16日，戴耀廷一篇題為《公民抗命的最大殺傷力武器》嘅文章，為違法佔領宣傳拉開序幕，違法佔領行動最後變成一個「只有群眾沒有大台」嘅群眾行動，戴耀廷就淪為指揮唔到群眾嘅「發言人」。廣男曾經以為，人哋都當佢無到，戴耀廷應該心死啦，點知前排立會選舉整個「雷動計劃」出嚟，近日又想喺特首選舉推動「民間公投」，組織民主派選委跟民意選特首。廣男感覺，戴耀廷其實「政治慾」都好大下喎！

首先，廣男認為推動「民間公投」本身係冇問題嘅，廣男之所以不屑戴耀廷嘅舉動，係因為佢自己好多時做嘢都係一廂情願，自己覺得民主就去馬，唔理做法係咪真係民主，又或者係咪為香港好。違法佔領呢個咁意見紛紜嘅行動，廣男暫且不說；以佢策劃嘅「雷動計劃」為例，一班人自己決定棄保邊個就將啲訊息散出去，選舉由選民投心宜代表，變成戴耀廷佢哋決定棄邊個、保邊個，最後選舉結果一出，連部分泛民人士都忍唔住鬧爆「雷動」。

欲推民間公投 泛民反應冷淡

立法會選舉之後，廣男記得戴耀廷話自己失去唔少人嘅信任，已經係負資產，廣男仲以為佢會乖乖哋做番個學者，唔知係咪戴耀廷鋪「政治癮」太大，唔夠一個月又蠢蠢欲動，有報道指佢想推動「民間公投」，畀民主派選委按公投結果喺特首選舉投票。其實呢，唔好話廣男呢啲普通人唔識「欣賞」戴耀廷嘅「努力」，連泛民啲議員都好似冇乜反應咁，例如建築、測量、都市規劃及園境界候任議員姚松炎話唔應該將公投結果與選委投票決定綑綁，社福界界候任議員邵家臻就話傾向投白票、公投綑綁式投票未必可行。

可能作為一個法律學者，戴耀廷多多少少都有政治、民主理想，但廣男唔認同佢，在於佢唔少行為，其實係違反民主精神。「雷動計劃」以可能取得議席代替選民心宜對象，「民間公投」就將他人意願凌駕於選委意願、原則。戴耀廷三番四次想「造王」，但次次「造」出大頭佛，到底係咩驅使佢咁有「Heart」呢？廣男真係好想知！