橫洲風波持續發酵，有人認為事件嘅「花生指數」極高，近期朱凱迪、姚松炎甚至「作家」鄺俊宇都不遺餘力狂插政府。廣男覺得，好多時候啲人批評政府，總有將事實、傳聞、意見以及所謂分析炒埋一碟，唔理三七廿一有咩point插咗鬧咗先算，除咗鄺俊宇扮唔知自己一早知道政府想喺橫洲起17,000公屋單位之外，廣男都想講下候任建築、測量、都市規劃及園境界功能界別立法會議員姚松炎博士，佢啲所謂「指控」，其實真係令人嘖嘖稱奇。

話說姚松炎噚日喺電台節目上提到，政府非正式諮詢時接觸嘅時任元朗區議會主席梁志祥、當區區議員鄧慶業以及屏山鄉鄉事委員會主席曾樹和等「當地」人士有直接利益衝突，話政府唔應該同佢哋溝通喎。嘩，真係聽到廣男個心都離一離，乜諮詢對象，即係所謂持份者，唔係正正應該包括當區人士嘅咩？

首先，如果姚松炎覺得諮詢當區議員等有利益衝突，咁樣諮詢當區非原居民係咪一樣有利益衝突？除非姚松炎持雙重標準啦，否則根據佢嘅思路，唔好講當區議員、鄉委成員，政府連當區非原居民都唔應該諮詢，因為當區非原居民一樣有利益衝突。咁講法，唔通要諮詢唔關事嘅人先啱？廣男真係搲爆頭都諗唔明。

對於測量、土地方面嘅知識，廣男唔會懷疑姚松炎嘅熟悉程度，佢係博士喎，見多識廣嘛。而家問題係，姚松炎係唔識政治所以講錯嘢，定係因為太叻玩政治所以知道呢個時候講乜都得，只要有人信、有人同佢一齊反政府就得呢？所謂要諮詢、收集持份者嘅意見，就係問下喺事件上有一定角色甚至利益關係嘅人有咩意見同建議。姚松炎反政府唔緊要，但如果將事件形為「利益衝突」，廣男就唔係好同意喇！

再講，如果大家留意下政府諮詢嘅對象，包括區議會主席、當區區議員、鄉委會代表甚至到隔離區泛民主派議員都有，佢哋喺社會上嘅角色就係法定諮詢架構嘅成員、民意代表，有人唔喜歡佢哋，廣男理解，但政府係咪有責任諮詢佢哋，又係另一回事。

至於諮詢公眾，政府除咗有正式諮詢區議會、鄉委會等民意代表機構外，其後亦有啟動城規會程序，包括刊憲諮詢公眾、接受及處理陳述等等，運房局常秘仲透露，城規會的確收到一定數量嘅反對意見，照咁講，姚松炎一味話政府齋「摸底」、「勾結」，明顯係過份咗，而且完全背離學者「根據事實及證據去分析及總結」嘅金科玉律囉！

原圖：std.stheadline