民意調查最大嘅特點係咩？反映民意？喺重大事件幫助大家掌握社會脈膊？錯喇，民調最大特點，係你信嘅時候將佢「奉若神明」；唔信嗰時，就將佢踩到變地底泥。點解廣男咁講？因為廣男睇完社民連同人民力量兩大「拉布」政黨炮轟港大民調記者會後，先知嗰班口口聲聲重視民意、支持港大嘅政客，當民調結果一唔啱佢心水，竟然即時將「學術」踩到一文不值，完全得啖笑。   「人社」兩黨講咩呢？佢哋喺記者會上面大大聲批評「民調不可靠，投票信自己」，又話港大民調「未有列出名單第二名」、「樣本少」同埋「誤差高」云云。「人社」扮晒「義正詞嚴」咁批鬥港大民調，相信唔少市民都好「安慰」，但出自「人社」兩黨就非常可恥囉！先唔講社民連主席吳文遠同人民力量劉嘉鴻都先後話過港大民調代表到「真民意」，根本今次港大個滾動民調就同四年前同一樣做法，四年前話你「人社」成功入局時，你又唔質疑佢？玩嘢咩！   為咗選舉，泛民政客真係去到好盡。之前當建制派就港大民調提出質疑時，泛民班人就好似鯊魚聞到血腥味咁撲晒出嚟咬人，唔理三七廿一「力撐」港大同負責民調嘅鍾庭耀，到今日自己唔滿意民調結果，就不惜「打倒昨日的我」，都係嗰句，滾動民調個做法同上屆相若，「人社」兩黨憑乜話有問題先？   老實講，廣男其實都幾質疑港大民調嘅可信性，但公道啲講，港大民調其實都講到明，即使調查時講埋排第二嘅候選人名出嚟，調查結果亦唔會有明顯唔同。今次由「人社」兩黨引爆嘅民調風波，再次令人深思港大民調嘅種種問題：到底係民調「誤導」人，定係班激進泛民已經被選民離棄？廣男唔敢答，大家不妨諗諗吖！   原圖：hket