作為一個80後，喺廣男讀緊中學嘅年代，有一個老生常談但係被覺得非常老土嘅作文題目，就係「中學生應否談戀愛？」相信當時有唔少同學仔同廣男一樣，都會斷然回答當然可以，仲會質疑點解唔畀中學生談戀愛呢？喺我哋阿公、阿婆果個年代，佢哋十幾歲已經結婚生仔啦，我哋呢啲學生一邊讀書一邊拍下拖仔，話唔定仲可以互相激勵大家讀好啲書，試問又有咩壞處呢？今時今日，以上題目當然已經outdated啦，而家應該問「中學生應否談『港獨』」先夠in呀嘛！對於呢個題目，廣男嘅答案係可以講嘅，咁點講呢？就係堅決向港獨說「不」！   教協張銳輝先生話，如果有中學生要講港獨，同埋帶住港獨議題去參選學生會，應該尊重學生嘅自主，畀佢哋自己討論，仲話學生關心社會，成年人應該求之不得喎。廣男就認為，要首先搞清楚班學生到底而家要做啲乜，先再去決定鼓唔鼓勵佢哋去做呢件事。   同應否談戀愛呢啲問題完全唔同，港獨唔係班學生講完就會「獨」，而係如果有一班學生（仲要係中學生）搞港獨，佢哋要做、會做嘅唔係喺學校派下單張、喺街擺下街站或者攞住港獨議題去選學生會咁簡單。佢哋要做嘅，係推翻一個政府，要推翻一個政府，就要發起唔符合法律嘅行動，例如發動政變推倒政府同梁天琦先生都聲稱要擁護嘅《基本法》，廣男想問下泛民或者教協嘅朋友，如果你哋反對學生違法，例如打架，點解你哋又唔反對學生搞港獨呢？係你哋唔知搞港獨可能會犯法？定你哋由得啲學生犯法，只要係反政府又反得啱你哋心意就得呢？   你話廣男老土又好、保守也好，有言論、思想自由唔代表可以將我哋嘅諗法付諸行動，有學生組織講明要擺脫統治、香港獨立，佢哋要做嘅，唔係用口講咁簡單，而係要付諸行動，廣男提個假設，如果有學生因為犯法而被捕，到時邊個最心痛？最心痛嘅就係佢哋嘅屋企人，而唔係你哋呢班政客！如果你哋話無事嘅、講下啫，廣男又想回應，喺所謂「講下」呢個階段，廣男已經不時見到有學生因為違法而被捕，炸垃圾桶被捕嘅有，恐嚇公職人員被捕嘅又有，或者示威果時被搜到有攻擊性武器被捕既都有，你哋唔好同我講呢啲係幻覺，年初一晚旺角暴亂單嘢廣男已經唔計架喇！   當我哋去思考自由嘅時候，唔好剩係諗因為自由所以可以做乜做乜，廣男雖然讀書唔多，都知道自由唔係放任而無所限制，當自己嘅自由影響到其他人，而且仲係犯法嘅時候，為人師表應該教導佢哋說不，而唔係叫佢哋go ahead！   原圖：RTHK