近期港獨參選人畀選舉主任決定提名冇效嘅事件鬧得熱哄哄，社會人士之間嘅意見莫衷一是，廣男本來對事件都作出唔到準確嘅判斷，但睇完《巴士的報》盧永雄嘅文章，對否決港獨人士參選嘅爭議總算有啲想法，究竟年頭新界東補選畀梁天琦參選，係咪就代表今次或者以後都可以參選呢？相信好多人都有呢個疑問。   盧永雄喺佢嘅專欄講左兩個法庭故事，用嚟類比今次梁天琦冇得參選嘅個案。第一個法庭例子，就係一個的士司機濫收車資被告，喺庭上辯稱自己幾十年嚟都係咁做，仲質疑政府濫告；呢個司機可能以為自己好威威啦，點知轉頭就畀裁判官噴到一面屁，同佢講每宗案件獨立處理，以前冇人告個司機，有好多可能性，但以前犯罪冇人告，唔代表今次司機犯罪係合理。   另一宗案件，就係一個年約40歲嘅男子被控告不小心駕駛，話說佢嘅右邊車切線撞到佢，但係佢都畀人告埋一份，呢名男子表示自己一直向前行，另一架車切線撞到佢，唔係佢做錯，裁判官即刻澄清，唔可以用其他車有錯，去證明自己冇犯錯，另一架車嘅司機都可能會畀人告埋一份，但喺呢件案，法庭會獨立考慮呢名男子有冇犯錯。最終，由於呢名男子因為冇充份留意路面情況，冇留意右邊架車有打燈準備切線，所以被判罪成。   由第一個法庭例子，可見以前犯法冇人理，唔代表而家犯法冇人理，梁天琦上次補選講港獨冇畀人取消資格，唔代表今次參選一定攞到提名資格。同理，其他人有冇犯法係一件事，自己有冇犯法又係另一件事，兩件事應該獨立處理。   或者有人會講，有啲人入到閘、有啲人入唔到，咪即係雙重標準囉！其實呢，選舉主任應該係以簽署聲明後為一條界線，睇下啲參選人簽署聲明後有冇違反聲明，梁天琦自己簽完聲明同記者講議會冇人代表港獨人士，佢要入議會代表佢哋，係佢自己自打咀巴啫，唔似得有啲「本土」派人士咁醒目，簽咗聲明之後語意曖昧，選舉主任都見唔到佢哋違反聲明嘅確實證據。   原圖：AP/達志影像