近年無綫製作既節目，無論係劇集抑或綜藝節目等等，唔少都畀觀眾插到飛起，搞到廣男都有少少尷尬，唔敢好似以前咁大大聲聲同人講自己係TVB粉絲，唔計最近播映既《一屋老友記》，廣男最近一套有追住嚟睇既無綫劇，數嚟數去都係得一套《EU超時任務》。最近無綫套《一屋老友記》（下稱《屋》）咁HIT，廣男當然有追住嚟睇啦，《屋》帶畀大家既唔只係一套好劇咁簡單，《屋》散發出嚟既溫馨感情，睇完的確會令人會心微笑。   《屋》之所以咁受歡迎，除左因為《屋》起用既演員個個都演得入形入格，福將歐陽震華要認真有認真、要悲傷有悲傷，胡楓及羅蘭既演技爐火純青，其他演員例如胡定欣、滕麗名等拿獵角色亦恰到好處，《屋》既編劇、導演亦應該大記一功。《屋》劇情不複雜，只係講本來各散東西既幾兄弟姐妹，因為要分死鬼老豆既遺產而再聚居一堂，住喺一間有兩隻「老友記」（即鬼）既舊屋，本來疏離甚至不和既幾兄弟姐妹，經歷不同事件後開始重新建立親人感情，最後HAPPY ENDING，變得團結、互愛。   《屋》既劇情，就好似70、80年代果啲舊港劇咁，講下一家人點樣由鬥氣怨氣變到相親相愛，有啲老土，但又惹人喜愛。廣男認為，《屋》果種溫馨既港劇味道、意義，其實好值得香港人反思；雖然，講番咸豐年前既獅子山、同舟共濟、互諒互讓既精神係有啲老餅，但呢種偏偏就係香港而家缺乏既精神，如果《屋》既主角們一直都堅守己見，唔願意原諒、了解番自己屋企人，廣男諗大家都唔會睇得咁開心。   「相見不好、同住更難」，近年社會的確發生咗好多令人唔開心既爭拗或者衝突，廣男認為如果爭拗過後，大家能夠以「一家人」既心態同意見不合既人溝通下，就算雙方變唔到「老友記」，都唔一定要變成「死對頭」既。   圖片：網上圖片