雲南昆明喺上星期六發生咗一慘無人道既血洗火車站恐怖襲擊案，造成29人被殺害同140多人受傷，事件震驚全世界。但令廣男最震驚既，唔係恐怖份子既凶殘手法，而係喺暴力殺人事件發生後，一向充滿正義感同有愛心既香港，竟然有啲擺明搞港獨既「老鼠屎」，喺港獨專頁上留言表示對事件感到「痛快」，仲希望無辜既內地人都「死多啲」，仲話要「感謝發動恐怖襲擊」既人，稱呼呢班殘殺平民既疆獨份子係「勇士」！老老實實，就算對內地有幾不滿都好，所有平民都係無辜既，每一個死者原本都有權活得幸福快樂，而且莫講話係活生生既一個人，眼見動物畀人慘殺，內心都唔可能覺得痛快啦，廣男想知果港獨份子係咪已經病入膏肓，或者已經變晒心理變態！

早前《明報》前總編輯劉進圖被斬傷入院，絕大部份香港人都義墳填膺，齊聲譴責暴行外，來自左中右陣營既新聞界、學界等人士仲走埋一齊舉行「反暴力、緝真兇」遊行；香港人總係在悲劇、危難發生之時發揮人性光輝一面，身為香港人既廣男都好自豪。但事隔無耐，內地昆明就發生同樣慘烈、受傷死亡人數更多既慘案，呢小部份成日話中央政府幾冇人道同唔尊重人命既網民，竟然會發表啲涼薄到冇人信言論，簡直就係去到人神共憤、令人齒冷既地方，廣男認為呢班港獨份子應該首先被譴責。

本港發生斬人案，港人勇敢企出嚟譴責，內地發生命案，我地唔係應該一視同仁咩？老實講，廣男唔介意一啲人，恃住自己係本土派人士而企喺道德高地批評他人，但我哋而家面對既係無辜被殺既生命，無論係咩人、咩身份、咩地位，都唔應該受到暴力對待，呢點係不刊之論，因為是非黑白極之清楚，冇得拗、冇得傾、冇得轉彎，果啲講出覺得「痛快」、「暢快」同「死多啲」既人，根本就唔係講緊人話，廣男甚至懷疑，佢哋係唔係人添。

「惻隱之心，人皆有之」，廣男認為同情心、同理心唔應該有雙重標準，在任何地區施暴既人，都應該受譴責、懲罰；而受殺害、傷害既人，則需要同情、協助。呢股為內地悲劇感到「痛快」既歪風思潮，絕對唔應該喺世界任何一個角落出現，作為香港一份子，我哋絕對唔可以怕咗呢股港獨惡勢力，佢搞唔搞港獨，去到呢個地步已經唔係最重要，更重要係呢班垃圾出賣人類既靈魂同良知既「人」，有可能影響我哋既下一代，隨時改變埋佢哋既價值觀，面對呢股網上惡勢力，大家真係仲要忍？

原圖：網絡圖片