一連24天的工展會明日於維園開鑼，「1蚊雞」產品勢成搶手貨。只限首天優惠除了限量10部「1蚊」全自動洗衣機外，還有同樣是限量10份的「1蚊」兩罐鮑魚及「1蚊」急凍高檔食品「福袋」，內有總值千元的鵝肝、羊架等食品。擔心唔夠人「手快」？唔緊要！因為部份參展商還有每日限定產品，當中包括「1蚊」限量滋潤杏汁豬肺湯包、「1蚊」買草本袪痛貼等；若有需要，到會展逛逛或能「慳唔少」。

今屆工展會由明天起至明年1月4日舉行，入場費10元，小童、長者及殘疾人士可免費入場。其實，展期期間亦有不少「筍貨」，例如今日起至下周五(18日)，有參展商就推出「1蚊」唧唧龜苓膏，每日限量100份；同期亦有「1蚊」買高麗參蜜餞片，每日限量30份。

有酒樓參展商揚言，零售市道疲弱，場內產品售價按年減兩、三成，更首度推出同步網售渠道，例如在會場可以「1蚊」買到的杏汁豬肺湯包，網店亦會每日同價限賣10盒。亦有海味店索性將會場價「標回」五年前價位，例如10頭罐頭鮑及新西蘭鹿筋每罐售298元及每斤640元，望能薄利多銷。

原圖：中通社