「你哋有開會，都唔似抗爭；你哋唔開會，又點樣抗爭？」呢句說話，係廣男送俾不理民意、決意「留任」、繼續「糧支」嘅攬炒派議員。為何有此一說？話說噚日立法會開會，喺審議《2019年廣播及電訊法例（修訂）條例草案》期間，竟然大部分攬炒派議員都不在席，於是有建制派議員撤回發言，令二讀辯論結束，最後通過咗相關修訂。廣男唔係要「狠批」攬炒派，但真係有少少忍唔住要笑下佢哋，連開都唔開，你哋點「抗爭」呀？
事後，民主黨立法會議員尹兆堅亦承認「甩轆」，仲解釋話「民主派」內部出現溝通不足，以往只靠默契安排人留喺議事廳，表示會「檢討事件」，例如編制「更表」安排議員喺議事廳內發言、列席云云。簡單嚟講，就係衰咗、檢討喇！
坦白講，當初話要「留任」立法會，係要抗爭、「守住」議會，有啲分析仲話攬炒派抗爭會越趨激烈，但係，睇返立法會復會後嘅情況，攬炒派基本上除咗點人數、Hea「拉布」同叫下口號之外，基本上係「零抗爭」；當中原因，其實就係《港區國安法》生效，一班攬炒派議員根本就係驚，所以只能「扮抗爭」、「扮做嘢」！
說好的拯救「12瞞逃」呢？
攬炒派唔「抗爭」，當然唔止得唔開會俾建制派「突襲」嘅孤例啦，之前佢哋決定「留任」，表明要救「12瞞逃」，結果點救？救人方法，原來係喺選票上面寫「Save 12」同喺保安局局長李家超面前「舉牌」，搞到人哋以為攬炒派會做啲乜嘢，原來係「舉牌救人」；另一例子，就係喺立法會資深司法任命建議小組委員會議上，竟然有攬炒派議員投咗建制派議員一票。廣男唔鍾意人「拉布」、搞議會抗爭，但都忍唔住要講一句，好心攬炒派不作為就唔好扮「抗爭」啦！
在攬炒派陣營而言，攬炒派議員要「守住議會」，但好「對唔住」，一班攬炒派議員，只係能夠「守住糧支」，守住百萬元薪金，守住近300萬元嘅辦事處開支津貼；見到佢哋嘅「不作為」而無限風光，廣男特別覺得攬炒派當中被捕、被檢控或者入獄嘅「手足」慘，喺同一陣營下，原來反差可以咁大。
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論