世界盃=那些年
世界盃=那些年

世界盃幾日前開鑼,廣男由於已經唔係十八、廿二,所以睇咗開幕戰俄羅斯大炒沙特阿拉伯之後,呢兩、三日啲比賽就算係「西葡」大戰都無睇喇。與其話世界盃一到就係睇波嘅黃金日子,廣男覺得世界盃其實係令人諗起「那些年」嘅日子先真,當年讀大學嘅時候同一班同學夜晚出去睇波兼唱K,實在愜意。而家,放工番屋企,放假又累到唔想郁,捱夜睇波嘅日子,俱往矣 …

最記得06世界盃

廣男最記得2006年世界盃果時,廣男掹車邊仲算係「學生哥」,同埋一班同學去K房一邊唱李克勤嘅《我著十號》,一邊唱K睇波,實在十分過癮;之後到決賽嘅時候,就一班同學去大商場睇決賽,當意大利擊敗法國奪得世界盃果一刻,有咁啱喺現場嘅其他同學仲感觸到喊(不過係見法國輸波所以喊),果個畫面廣男到而家都仲記得。可能因為廣男唔算係咩熱情嘅球迷,所以世界盃對廣男嚟講,依然係番緊學、柴娃娃嘅「那些年」回憶。

時移勢易,物轉星移。今年世界盃再來臨,坦白講廣男已經冇咗當年果種好期待嘅感覺,因為平日放咗工又未必有時間睇;放假呢,都要照顧好家庭同休息先。如果嚟緊嘅賽事可以同班舊同學再聚一聚睇下波,咁就Very Good喇!人大咗,要兼顧嘅嘢都多咗,原來可以輕輕鬆鬆同班friend睇下波、飲下啤酒,都係一件唔簡單嘅事,實在有啲感慨下。

支持葡萄牙、阿根廷

講咗咁多廢話,廣男循例都要講下自己捧邊隊波嘅。本來支持邊隊廣男冇咩強烈意慾,但如果一定要講支持邊隊,心水都一定係葡萄牙或者阿根廷,點解?因為咁多年嚟,葡萄牙嘅C朗同埋阿根廷嘅美斯都幫廣男喺Winning Eleven(足球遊戲)入面入咗好多波,所以情感下都係支持呢兩隊多啲;尤其係阿根廷,上屆只係差少少就可以攞世界盃,希望美斯今次可以圓夢啦!

原圖:FIFA世界盃Facebook專頁

評論