有理想 做乜都得?
有理想 做乜都得?

前幾日,轟動一時嘅旺角暴動案審訊多時終於有判決,本土民主前線前發言人梁天琦有一項暴動罪罪成,連同之前嘅襲警罪總共被告入兩條罪;唔同人士對於今次判決反應都幾兩極下,痛恨暴力嘅人當然歡迎梁天琦被判有罪嘅決定,而向來不惜一切都要盲反政府嘅人,好似就好想將暴動個波「交畀政府」咁,有啲人喺幫梁天琦求情嘅時候仲講到好似一切都係「社會的錯」咁。廣男作為一個普通年輕人,都忍唔住要問一句,係咪有理想或者想爭取民主,就做乜都得,包括可以打人、襲警先?

梁天琦不是義士

其實喺旺角暴動案有判決前,廣男已經見到網上面有唔少人話梁天琦係義人、義士,到案件有判決以至被告求情嘅時候,唔少人都好似想將「個波」交出去咁,例如梁天琦嘅代表律師就話自己果一代人「乜都唔使做」以為民主就會嚟,梁天琦爸爸就話相信梁天琦唔係蓄意襲警,只係一時氣憤魯莽,搞到法官都忍唔住問一句,係咪有呢個背景,就可以使用暴力合理化呢?

事實上,綜觀近日嘅社會輿論,有部份人士都似乎想轉移視線,講到好多都係因社會問題而起咁;但廣男想喺度指出,每個社會或多或少都有佢嘅問題,但解決問題嘅方法,好難包括埋「用暴力囉」。如果今日A君不滿政府可以用暴力,第二日B君又學A君咁「以武服人」,咁個社會仲有法治、秩序可言嘅?違法達「義」,係咪真係有「義」可言呢?廣男個人就絕對唔贊同喇!

是一時衝動 還是早有預謀?

另一個問題,就係梁天琦以至佢嘅「同路人」似乎都係營造緊一種暴動案屬於「突發嘅偶然事件」咁,廣男唔係梁天琦肚入面條蟲,當然冇可能知道佢當時點諗啦。但係,廣男聽過一個網上電台節目,梁天琦就曾經高調談論「抗爭」戰術,話有事時要預先聚集人馬,再換Black Bloc (一種抗議遊行活動中使用嘅戰術,特徵係每個人都穿著同一顏色服裝、戴黑超同圍巾等),等警方評估低啲,再令事件升溫,仲話年初一旺角暴動果時都係咁。觀乎梁天琦、黃台仰等人嘅裝束、裝備,再加上梁天琦呢番「親身解說」,佢同黃台仰係早有預謀,定係一時興起,相信大家都心中有數。

當事情已經發展到暴動者被判罪成,而個別人士嘅焦點都仲係講有「社會問題」,或者繼續將梁天琦「英雄化」,咁樣只會畀到公眾尤其係年輕人一個十分錯誤的訊息,「為理念、為社會,就算做錯事或者用暴力都值得原諒」;廣男真係想喺度問下盲反派班政客或者梁天琦嘅老一輩支持者,如果梁天琦咁值得「尊崇」,你哋點解又唔叫下自己啲仔女「學習」下梁天琦呢?有句說話叫「己所不欲,勿施於人」,間接鼓勵人犯法、用暴力,係有社會代價的! 

原圖:大公報

評論