幾個喺立法會補選勝出嘅候任立法會議員聽日就會喺立法會宣誓，外界都非常關注啲議員宣誓嘅時候會唔會玩嘢，尤其係曾經當眾焚燒《基本法》仲要話自己唔介意「再燒」嘅區諾軒。區諾軒似乎喺兩位前立法會議員羅冠聰、姚松炎佢哋身上吸取到「充足嘅教訓」，話自己宣誓唔會玩嘢，仲話按規矩宣誓係「全港市民願望」；囍雨就覺得，如果區諾軒真係咁尊重市民意願，佢日後入到立法會，就應該少啲黐埋啲「自決」友、少啲玩嘢，多啲做實事，而唔係「依法宣誓　」咁簡單囉！ 

先就燒《基本法》道歉

經過DQ事件之後，盲反派基本上都知道如果宣誓再玩嘢，唔能夠開會之餘，個議席更加一定冇埋。所以無論係曾經焚燒過《基本法》嘅區諾軒，抑或曾經出宣傳品話「有民主，便不會有港獨」嘅范國威，都向傳媒表示會按照法例宣誓，其中區諾軒仲話按規矩宣誓，係全港市民嘅願望。對於盲反派肯不再喺宣誓時玩嘢，雖然好可能只係出於政治考慮，但囍雨都表示歡迎嘅；不過，囍雨就覺得依法宣誓，只係表示擁護《基本法》嘅其中一個方式，一個立法會議員能唔能夠貫徹始終擁護《基本法》，先係重點所在！

老實講，區諾軒先有焚燒《基本法》嘅紀錄，又表示過唔介意再燒《基本法》，甚至曾經質疑前黨派嘅《決議文》點解冇「港獨」選項，佢要表現出自己願意擁護《基本法》，必先向公眾攞出誠意！所以呢，如果區諾軒想釋除公眾對佢搞「港獨」、「自決」或者唔擁護《基本法》嘅疑慮，喺佢宣誓就任立法會議員前，應該同公眾講個明明白白，同埋就自己曾經焚燒《基本法》向公眾道歉。

市民但願議員做實事

其實，區諾軒真係明白跟規矩或者法律宣誓，係全市民願望嘅話，囍雨都希望佢明白，市民亦都希望議員唔好下下喺度搞「港獨」、「自決」，切切實實為市民做事，喺議會內外促進民生、經濟發展。老實講，今次盲反派喺立法會補選大跌票，多多少少同佢哋剩係搞政治唔理民生有好大關係，區諾軒或者其他盲反派倘若真係願意順從市民意願，就麻煩你哋「少搞事，多做事」啦！  

原圖：RTHK