學校課程 由浸大生說了算?
學校課程 由浸大生說了算?

自從違法「佔中」以來,囍雨覺得年輕人之間總係彌漫住一種「我大晒」嘅想法,我唔妥你,唔好話鬧你,包圍你甚至攻擊你又如何?最新例子,就係一班浸大學生因為唔滿意普通話豁免試嘅合格率偏低,走去學校嘅語文中心圍啲教師,仲要係用粗口鬧人果隻。囍雨覺得有關行為極度過份,如果天下間學生都因為唔合格去「圍」老師,咁校園會變成點呢?


諉過於人 侮辱教師


一個最根本嘅問題,就係學生如果對學校以至課程有意見,應該點做呢?囍雨就覺得,正常渠道應該係約見相關教師甚至課程設計者,心平氣和向教師表達意見!囍雨仲係學生嘅時候,都出現過有啲科目合格率偏低,甚至影響部分同學畢業,但囍雨果時啲同學有冇去「圍」教師呢?梗係冇啦,最多都係問啲教師點解會咁,問幾時可以重開科目,又或者叫學校考慮開個Summer Term,等啲同學唔駛延遲畢業。而家啲浸大生採取一種近乎「黑社會圍人」方式去「聲討」教師,佢哋知唔知咩叫尊師重道先?!


學校課程 豈是學生說了算


另外,囍雨覺得課程點設計、評分準則如何,係唔係要由班學生說了算先?唔同大專院校都會有唔同嘅必修科要啲學生去讀,有啲學校要學生上好中、英文課程,有啲學校例如浸大要啲學生上普通話課,有啲院校嘅學系要學生通過打字速度測試囍雨都聽過,而唔同院校有唔同要求,都係基於重視學生嘅語文能力或者必要嘅技巧;如果班學生唔鍾意就要迫學校去改,而學校又要屈服於佢哋「淫威」之下,咁以後冇人要讀書啦,索性叫學校取消啲合格率嘅科目佢囉!


浸大校長錢大康表示,對於學生唔負責任嘅行為感到痛心同難過,校方會按程序嚴肅跟進學生嘅粗劣行為。囍雨今朝聽電台,果個有份「圍」教師嘅浸大學生會會長代表仲講到自己冇錯咁,話自己唔會道歉;既然錯得咁離譜都唔肯認,咁囍雨請浸大校方千祈唔好手軟!如果查證後有學生違規違德,一定要嚴懲呢班「佔領學生」,學生唔想讀佢哋可能會唔合格嘅科目,學校又需要唔尊重學校、教師嘅學生咩?


原圖:網絡圖片

評論