立法會參選人 請表明是否支持「港獨」?
立法會參選人 請表明是否支持「港獨」?

立法會補選將於明年三月舉行,隨住戰幔拉開,建制以至盲反派都陸續開始出現一啲疑似參選人,包括以往經常高舉「本土」、「自決」旗幟嘅張秀賢、周庭以及范國威等;只要符合法律要求,任何人當然都可以參選,不過呢班疑似參選人尤其係張秀賢同周庭呢兩個「自決派」,至今都未算好清晰同公眾交代清楚自己所謂嘅「自決」,到底係唔係即係認同「港獨」係香港未來嘅一個選項。選民呢一刻最想知道嘅可能係:如果「自決」唔係「港獨」,咁又係咩意思呢?「自決」前途,係唔係即係唔反對「港獨」呢?

 

表面「自決」 實質「港獨」?

 

好似中大學生會前會長張秀賢咁,佢其實曾經公開話:「香港獨唔獨立,係一個好值得討論嘅問題!」言下之意,喺佢心目中「港獨」係可行方案之一啦,不過,佢近日唔知係咪因為要參選、怕被DQ,突然又轉晒口風喎,話「港獨」唔係佢主張。喺呢度,囍雨只想問一句:咁你即係認唔認為「港獨」係香港選項之一?認唔認為香港可以單方面決定「港獨」與否?如果佢唔支持「港獨」、又唔認為「港獨」係選項之一,咁佢口中嘅「自決」係乜東東?「自決」根本係變奏版「港獨」,佢又有咩解釋呢?

 

另一方面,周庭所屬嘅「香港眾志」眾所周知係宣揚「自決」理念嘅政治組織,更曾經揚言要將「自決理念植根民間」,佢哋個秘書長黃之鋒喺電台節目唔肯承認自己係中國人、又話「港獨」係選項之一,而家周庭出嚟代表「香港眾志」參選,會唔會又係搞搞吓變成變奏版「港獨」呢?唔該周庭好好講清楚囉。

 

事實上,「自決」同「港獨」之間嘅界線好模糊,一班盲反派疑似參選人當然會話佢哋唔係搞「港獨」啦,因為一用上「港獨」呢個字眼,就有機會被DQ。但係,「自決」嘅理念如果發展落去甚至付諸實行,就會變成畀香港人「決定自己前途」,而「港獨」作為香港人自決命運嘅一個選項,如果你問囍雨,宣揚「自決」概念,其實都類同宣揚「港獨」架喇!

 

參選人應表明反港獨、反自決

 

所以囍雨覺得任何立法會參選人也好,無論係建制抑或盲反派,都應該清楚表明自己嘅政治立場,除咗係咪反對「港獨」之外,係咪支持「自決」都應該講清講楚;如果願意反「港獨」同埋反對可能變成「港獨」嘅「自決」理念,咁先會符合參選資格。

 

如果大家有留意盲反派班疑似參選人嘅一言一行,佢哋好多說話其實都含糊其詞,大家有冇聽過佢哋話要擁護特區、擁護《基本法》同「一國兩制」?囍雨聽落就唔覺喇。點解都有「高度自治」喇,佢哋又唔肯講,點都要講「自決」,內裡文章究竟係點?如果有人想搞「自決」甚至「港獨」,囍雨建議佢哋都係回歸「街頭」,做個抗爭鬥士啦!


原圖:RTHK

評論