《國歌法》將會開始本地立法，盲反派為反《國歌法》各出其謀，較溫和嘅話《國歌法》會令人誤墮法網，較激嘅好似民主黨林卓廷之法，就不斷係咁「作故仔」，講到《國歌法》立法後連坐輪椅嘅都要肅立咁。咁「港獨」派就更加「出位」喇！民族黨領袖陳浩天日前就衝晒去中聯辦門口唱「粗口版」國歌，又高叫「We are HongKongese（我們是香港人）」等口號。係囉，其實國歌無罪架！只係啲人借嚟宣示「港獨」立場之嘛！

行為過激 何止反國歌法

噚日，一班所謂網民號召市民示威反《國歌法》，幾十人「浩浩蕩蕩」去中聯辦示威，參加者包括「香港民族黨」陳浩天、沙田區議員陳國強、「北區水貨關注組」召集人梁金成等等，一班人遊行期間喺度高叫「We are HongKongese（我們是香港人）」、「We dislike Chinese（我們不喜歡中國人）」等口號，陳浩天仲聲稱國歌唔係用廣東話，所以唔能夠代表香港咁話。呢班人表面反《國歌法》，其實就係借機宣揚「港獨」，仲要係邊侮辱國歌邊「播獨」果隻！

其實，陳浩天等人一直都等咗呢個機會好耐，幾個月前國家主席習近平到港期間，佢就想搞個聲稱「香港淪陷20年」嘅「播獨」集會，不過當時警方當機立斷，向佢發出「反對通知書」，唔畀呢條「港獨」友搞破壞。今次陳浩天借參加遊行宣揚「港獨」，佢應該等咗一段時間，先有呢個機會喺公眾地方「播獨」。

國歌法立法更迫切

平心而論，《國歌法》基本上唔會影響到無意侮辱國歌嘅人，即係百分之九十九點九嘅香港市民呀，而反對得最用力嘅，嚟嚟去去都係得盲反派班人；今次陳浩天佢哋借遊行宣揚「港獨」好似好威咁，實則係市民看在眼裡，見到呢班人公然侮辱國歌仲要搞「港獨」，只會更認同《國歌法》有立法嘅迫切性。無論鍾唔鍾意自己國家都好，都應該對國家象徵例如國歌表示尊重，呢班人連「粗口版」國歌都唱埋，擺明喺未立法前「挑機」，咪令人更加反感囉。

有份參與遊行嘅梁金成話第時《國歌法》立法之後，佢哋都會去中聯辦「噓國歌」。老實講，囍雨無能力阻止有人去犯法，但只想講一句，如果到時有心「噓國歌」而被捕、被告，嗱，你班人唔好又老屈執法部門係「政治打壓」喇。大家今日一定要記住梁金成呢個曾經同新民主同盟行得好埋嘅人、記住佢講過啲咩呀！

原圖：港人講地